august 27, 2009 av eies
“Me ( – og “me” er fiskegruppa i Jostedal Grunneigarlag) må få sluttført fiskeplassrydding-prosjektet vårt. Me har gjennomført rydding som planlagt i 2007 og så har me nokre timar i 2008, men me treng nokre timar i 2009. Er det nokre plassar som treng ein innsats som du veit om eller skal ein berre gå over plassane? Kan du få med eit par personar ein ettermiddag å rydde/utvide fiskeplassane våre?”
Plassane er: Øy 2 plassar, Fåbergstølen 2, Ved Bresenteret 1, Gjerde 1, Haugli 1, Jostedal 1, Sperla 1, Fossøyane 1.
Dette er altså 100% frivillig arbeid som skal gjera nokre fiskeplassar lettare tilgjengelege. Arbeidet kan vera forskjellig, men rydding av skog, busk og kratt er ein vesentleg del.
Eit par timar ein kveld er bra.
Ta gjerne kontakt med Magnus Snøtun, Lasse Tuften eller Einar Ese. Det er lettare for oss å spørja folk som kan vera litt interesserte i slikt arbeid. Les om tidlegare dugnad på dette innlegget.
Elles kan du lesa smått og stort om fiske i Jostedøla her.
Posta på Fisking | 2 kommentarar »
august 21, 2009 av eies
Ein liten sensasjon vil eg kalla det at fire jordgraver er oppdaga ved Vigdalsstølen. Etter det eg veit, har ingen visst om desse tidlegare. Alle gravene var parallelle. Dei låg oppe på eit platå. Opp til gravene gjekk det ei bratt reine. Gravene var nokså djupe. Eg har høyrt at dei tidlegare kast stein, røter mm. ned i jordgravene for at ikkje beisti skulle bli liggjande på ryggen nedi dei.
Du kan gå nedover frå stølen Breisete i om lag 100 meter avstand frå elva til du er på høgde/parallelt med Vedahaugane. Vedahaugane ligg altså på motsatt side av elva. Den game reievegen/kløvjevegen (der ma. Nils Ormberg kløvja ost…) går rett forbi den eine grava. Denne vegen vert no brukt stort sett berre av dyr.
Etter som eg forstod var det under ei synfaring der Tom Dybwad, Lars Vigdal og Erling Bjørn Vigdal deltok, at dei fann dyregravene. Lars Vigdal var seinare så hyggeleg at han ville ta seg tid til å visa meg dyregravene. Det er eg takksam for!
Eg har teke to foto av kvar grav. Ser at fototeknikken min er litt mangelfull. Det er ikkje alltid like lett å sjå kva dette er. Men gjer deg ein tur opp, og du blir ikkje i tvil!
Posta på Dyregraver, bogastille mm. | Legg att ein kommentar »
august 20, 2009 av eies
Posta på Synsing | Legg att ein kommentar »
august 19, 2009 av eies
Marengskaka er heilt til høgre og fremst på biletet.
Ho er ikkje spesielt vanskeleg å laga. Men det blir ein del oppvask, dessverre. Når du rører saman dei hakka nøtene (hurtigmiksar…?) – sukkeret og dei stivpiska kvitane, trur eg det er lurt å ikkje vera altfor ivrig, men “vend” det forsiktig saman. Eg plar bruka bakepapir og varmluft. Ha ikkje altfor mykje vatn i kremen. Kjøl kremen ned før du har han på kaka,
Får du problem med bakinga, så skriv ein kommentar. Men fleip svarar eg truleg ikkje på.
Posta på Synsing | 2 kommentarar »
august 16, 2009 av eies
Ottadalen Villreinområde har ei eiga nettside der dei legg ut jaktinfo, dvs. opplysningar om kor villereinen for øyeblikket er. Dette er spesielt interessant for jegerane under jakta. (Klikk på Jaktinfo i venstre margen)
Det er sjeldan det har vorte lagt ut opplysningar om villrein i Jostedalen. Men dei gongene det har vore gjort, har det frå jeger-/villrein-interesser her i dalen vorte hevda at dette har ført til at reinane har vortne skotne. Sjølvsagt kan dette vera tilfelle, men heilt sikkert veit me vel ikkje dette.
På Lustra-sida mellom Skjåk og Luster er all rein freda. Diverre er reinen straks over grensa til Skjåk ikkje freda. I forhandlingsmøte har det likevel kome signal om at også området nærmast Luster, på Skjåk-sida, kan bli freda. Men dette kan tidlegast koma i stand frå jakta i 2010. Kor dette fredingsområdet på Gudbrandsdalssida skal vera, er diverre noko uklart. Frå Skjåk har eg fått signal om at dei vil godta ei freding av Tverreggi, Syrtbyttdalen og Mysubyttdalen. Viss dette går i orden, vil nok grunneigarane fremst i Jostedalen bli glade og nøgde. Heilt sikkert!
Eg har inntrykk av at Skjåk denne gongen er positive til ei villreinreetablering i Luster. Ein av grunnane er den såkalla klima-krisa, der dei er redde for at klima-endringane kan gå hardt ut over isbreane i Skjåk. Villreinen er heilt avhengig av brear på varme sommardagar, og dei reknar med at Jostedalen/Luster vil ha sikker tilgang på brear også i framtida.
Sidan det var uråd å få til noko freding av grenseområda i Skjåk, vart eg til slutt så utolmodig at eg tok direkte kontakt sjølv, og eg fekk personleg ein muntleg lovnad om at opplysningar om villrein på Jostedalssida ikkje skulle leggjast ut på Jaktinfo på Ottadalen villreinområde si heimeside. Eg har tiltru til at denne lovnaden skal verta halden.
Det som kan skje, er sjølvsagt at jegerar med fellingsløyve i Skjåk stikk nett over til Jostedalen og “hentar” nokre reinar som dei så feller, rett over på Skjåk-sida. Sjølvsagt er ikkje slikt lovleg. Og seriøse jegerar vil aldri finna på noko slikt.
Men for likevel å vera på den sikre sida: I tida no og framover til reinsjakta er slutt, vil eg ikkje leggja ut opplysningar på denne bloggen om villreinobservasjonar i Jostedalen/Luster.
Posta på Reetablering av villrein | Legg att ein kommentar »
august 16, 2009 av eies
Sjå video frå NRK Sogn og Fjordane. Mest frå Sota sæter.
Posta på Reetablering av villrein | Legg att ein kommentar »
august 16, 2009 av eies
Sjå video frå NRK Sogn og Fjordane.
Posta på Statkraft, Vestsideelvane mm. | Legg att ein kommentar »
august 11, 2009 av eies
Eit lam er funne i Haugabakkane/Byggefeltet-området. Drept av gaupe.
To lam funne framom Bresenteret. Drept av gaupe. Det er påfallande at gaupa visstnok ikkje har ete noko særleg av lamma. Naturleg nok fortvilande for saueeigarane.
I Vanndalen har ein av dalens yngre saueeigarar mista ei søye og eit lam. Dei vart funne blant nokre steinar/i ei ur. Dødsårsaka var vanskeleg å fastslå, men etter det eies forstår kan ein ikkje utelukka at dyra er “sprengde”. Dette kan likevel ikkje seiast sikkert.
Men uansett så er slikt uheldig for oss hundeeigarar. På vegne av alle hundeeigarar, må eies berre minna om bandtvangen. Det som er spesielt farleg, er viss to eller fleire hundar er lause, og byrjar å jaga. Uansett: Alle skal ha kontroll på hundane sine!
Posta på Hund, Rovdyr | Legg att ein kommentar »
august 8, 2009 av eies
Det vart visst både duplikat og anna rot her. Får prøva å fiksa det seinare. Eg har brukt uttrykket “mellombukk” utan at eg veit om det er noko som heiter det. Men håpar folk forstår.
Det er eigentleg med litt blanda kjensler eg legg ut desse bileta. Viss me skal få reinen til å trivast gjå oss, er alfa og omega at han får ro og ikkje vert forstyrra unødig. [Det er vel noko slikt min gode ven, byggefelt-karen, meiner når han seier at eg er håplaus: Straks eg får vita om rein, så skriv eg om det på bloggen min! Difor har han ikkje vilja fortalt meg om 22 rein som går rett framom Styggevasshytta. Eg kjem berre til å skriva om det, seier han...]
I tidlegare tider var det ein uskriven regel at såg du rein før jakttida, så skulle du halda kjeft. Jakt var også konkurranse. I våre dagar er det slik at eg i min naivitet trur på opplysning. Eg trur folk flest ikkje er interesserte i å øydeleggja for reetableringa.
Onsdag 5. august hadde eg ein rusletur langs Styggevatnet og Austdalsvatnet. Desse to bukkane dumpa eg brått på. Den eine var vel ein “storbukk” og den andre ein “mellombukk”.
Ved Austdalsvatnet kom me på tre bukkar, to storbukkar og ein mellombukk.
I tillegg såg me spor etter det som kunne vera ein storbukk og ein mellombukk. Me såg altså til saman fem reinsbukkar, men truleg var der minst to i tillegg.
Kvar kom reinane frå? Sidan eg dagen etter var i Sprongdalen utan å sjå spor, lort eller andre ”ting” etter rein i det heile teke – i alle fall så godt som – så kan det sjølvsagt tenkjast at reinane kjem frå Nord-Vest-området.
Ei anna muleg forklaring kan vera denne: Vår dyktige fjelloppsynsmann Einar F. sit på mykje erfaring når det gjeld rein. Viss eg ikkje misforsto, sa han at han skulle kunna skilja Vest-Jotunheimenrein frå Ottadalsrein berre på fargen. Rein frå Vest-Jotunheimen er nemleg mykje mørkare. Viss dette er rett, kan mykje tyda på at desse reinane er “rømlingar” frå Vest-Jotunheimen. Det har gått ein “mystisk flokk på 60 – 70 rein i området som vert kalla Sumarkvile. Det kan vera rein frå Vest-Jotunheimen. Eg ser ikkje bort frå at dette kan vera ei rimeleg forklaring.
Posta på Reetablering av villrein, villrein | 3 kommentarar »
